Barat da classa en Svizra
Duas classas da differentas regiuns linguisticas visitan ina l'autra u s'inscuntran per in'activitad cuminaivla. Uschia dovran els lur enconuschientschas en ina lingua estra cun glieud giuvna da la medema vegliadetgna e scuvran in'autra cultura en la Svizra.
Survista
Per tgi
- Per classas e gruppas da scola dal stgalim primar e dals stgalims secundars I e II
Durada
- A partir dad in di
Nua
- En in'autra regiun linguistica da la Svizra
Tge che nus sustegnin?
Sustegn finanzial per l'organisaziun, il viadi, il segiurn, las pernottaziuns ed activitads
Classas partenarias ed activitads chattais Vus sin la plattafurma match&move
Tge far
- Persunas d'instrucziun participantas u autras persunas organisaturas tschertgan ina classa partenaria, planiseschan il project ed inoltreschan la dumonda da sustegn.
Termins da scadenza
- Termin d'inoltraziun: cuntinuadamain, almain in di avant l'emprim inscunter en persuna
En detagl
In barat da classa en Svizra ha lieu tranter duas u dapli classas u gruppas da scola da differentas regiuns linguisticas. Ellas pon organisar visitas vicendaivlas, in viadi da scola, in camp u nizzegiar la chaschun per in'emna da project per far in barat da classa. Grazia a las activitads cuminaivlas cun la glieud giuvna en la medema vegliadetgna emprendan las scolaras ed ils scolars a duvrar la lingua emprendida en il mintgadi. Savens constateschan ellas ed els ch'i vegnan da communitgar bler meglier che pensà. Quai augmenta la motivaziun per l'instrucziun da lingua.
Emprender orientà a las cumpetenzas
In barat da classa promova ils contacts interculturals tranter la Svizra tudestga, franzosa, taliana e rumantscha. Quai motivescha las scolaras ed ils scolars da bandunar lur zona da confort e rinforza lur abilitads sco p.ex. l'avertadad e l'independenza.
Grazia al barat emprendan las persunas d'instrucziun d'enconuscher autras metodas pedagogicas e didacticas. Plinavant dovran ellas ed els a moda pratica la lingua ch'els instrueschan.
Il barat tranter las regiuns linguisticas da la Svizra rinforza la chapientscha vicendaivla e la coesiun naziunala.
Premissas
Il project che Vus planisais cun Vossa classa partenaria sto ademplir il suandant:
- Almain duas classas u gruppas da scola (scolas publicas u privatas) dal stgalim primar, ils stgalims secundars I e II (gimnasis, scolas medias u scolas professiunalas) da duas u dapli regiuns linguisticas da la Svizra (interchantunal u entaifer il chantun) fan part. Nus preferin projects interchantunals.
- Per Voss project da barat elavurais Vus in program che pussibilitescha a las scolaras ed als scolars d'interagir mintga di sur ils cunfins linguistics ora. Plinavant duain las scolaras ed ils scolars s'occupar durant almain dus differents muments dal project cun il tema "emprender linguas e cultura svizra".
- Las scolaras ed ils scolars s'inscuntran per almain in di.
- En in barat da rotaziun fa almain la mesadad da la classa part ad in inscunter fisic.
- La dumonda stuais Vus far almain in di avant l'emprim inscunter fisic.
Contribuziuns da promoziun
- per la planisaziun: 150 CHF (per scola partenaria)
- per il viadi: 15 CHF (per di da viadi e per scolara u scolar sco era per persuna d'instrucziun u persuna accumpagnanta)
- per il segiurn: 10 CHF (per di da segiurn e per scolara u scolar sco era per persuna d'instrucziun u persuna accumpagnanta)
- per pernottaziuns:
- 20 CHF per pernottaziun obligada da pajar e per scolara u scolar sco era per persuna d'instrucziun u persuna accumpagnanta (en in albiert per la giuventetgna, in campadi euv., la pernottaziun tar ina famiglia na po betg vegnir sustegnida);
- 100 CHF per pernottaziun supplementara per persuna d'instrucziun u persuna accumpagnanta (p.ex. sche las scolaras ed ils scolars stattan tar famiglias e las persunas d'instrucziun u las persunas accumpagnantas stattan en in hotel)
- per basegns spezials da persunas cun in impediment fisic u psichic: max. 12'000 CHF (tenor rapport da basegn).
Las contribuziuns da promoziun per persunas d'instrucziun u persunas accumpagnantas na valan betg per il barat da rotaziun damai che las persunas d'instrucziun u las persunas accumpagnantas na viageschan en quel cas betg.
- La clav da calculaziun per il dumber da persunas d'instrucziun u persunas accumpagnantas:
- fin a 14 scolaras e scolars: 1 persuna d'instrucziun u persuna accumpagnanta
- fin a 24 scolaras e scolars: 2 persunas d'instrucziun u persunas accumpagnantas
- fin a 34 scolaras e scolars: 3 persunas d'instrucziun u persunas accumpagnantas
- euv.
Tip: Intgins chantuns porschan sustegn finanzial supplementar per organisar in barat da classa. As infurmai tar la persuna responsabla da barat.
Proceder
La dumonda per ina promoziun finanziala dal barat da classa inoltrescha la persuna d'instrucziun involvida, la scola involvida u il chantun involvì per tut las classas partenarias.
-
1
1. Chattar ina classa partenaria
Per realisar in barat da classa duvrais Vus ina u pliras classas partenarias en in'autra regiun linguistica.
- Faschai diever da Vossa rait persunala u professiunala.
- En cas che Vus n'avais anc nagina classa partenaria As gidain nus da chattar ina sin nossa plattafurma match&move. Sin match&move pudais Vus inserir u contactar persunas d'instrucziun che han gia inserì. Vus pudais inserir sin la plattafurma u contactar persunas d'instrucziun che han gia inserì. Plinavant chattais Vus là ideas per acziuns che Vus pudais far durant in barat da classa e nus mettain a disposiziun a Vus resursas per l'organisaziun.
- Profitai da l'emna da barat naziunala durant il november per in inscunter – uschia èn Vossas schanzas da chattar ina classa partenaria fitg bunas.
- Vegni a savair dapli dal tema chattar ina partenaria u in partenari.
-
2
2. optional Vorbereitenden Besuch vorsehen
Möchten Sie mögliche Projektpartner:innen vor Ort treffen, um sich kennenzulernen oder ein gemeinsames Projekt auszuarbeiten? Sie erhalten finanzielle Unterstützung für einen vorbereitenden Besuch.
-
3
3. Planisar in project
- Planisai communablamain cun la persuna d'instrucziun da la classa partenaria il cuntegn, la furma ed il temp dals inscunters. Per la dumonda da promoziun duvrais Vus in sboz da program per ils inscunters ed ina curta descripziun da l'intent (almain 500 segns).
- Sin match&move chattais Vus ideas per activitads e pudais cudeschar ina visita en in museum u in lavuratori tar ina da nossas instituziuns partenarias.
- Nus recumandain da viagiar a moda bunmartgada e favuraivla al clima cun il traffic public: VFF bigliets da gruppa.
- Profitai da noss partenadi cun Albierts da giuventetgna svizra e survegni rabat per las pernottaziuns.
-
4
4. Inoltrai ina dumonda da promoziun
- Inoltrai online ina dumonda da promoziun. Questa dumonda sto arrivar tar nus almain in di avant l'emprim inscunter.
- I dovra mo ina dumonda per tut las classas cumpigliadas.
- Sche Vus avais gia fatg il program e la descripziun dal project duvrais Vus ca. 15 minutas per emplenir la dumonda da promoziun.
- Suenter che Vus avais inoltrà la dumonda da promoziun examinain nus quella.
- Entaifer 25 dis suenter che Vus avais inoltrà la dumonda survegnis Vus resposta. En cas che Voss project ademplescha las premissas tramettain nus a Vus ina consegna positiva cun ina conferma che Vossa direcziun da scola sto suttascriver.
-
5
5. Sbursament da las contribuziuns da promoziun
- 80% da la summa entira pajain nus entaifer 30 dis suenter che nus avain survegnì la conferma suttascritta.
- Il rest da la summa pajain nus suenter che Vus avais inoltrà il rapport final.
- Il sbursament faschain nus directamain a las scolas cumpigliadas u a las persunas d'instrucziun.
-
6
6. Realisar in barat da classa
- Preparai Vossas scolaras e Voss scolars per il barat, p.ex. cun sensibilisar per autras valurs culturalas, tradiziuns u cumportaments: tips per la preparaziun interculturala.
- Giugai il gieu generatur d'aventuras pitschnas per trenar cumpetenzas interdisciplinaras – ellas èn spezialmain impurtantas per in barat gartegià.
- Planisai ina chatscha da zinslas u ina visita en il museum ch'èn vegnidas preparadas aposta per classas en in barat. Ideas e purschidas chattais Vus sin match&move.
- Tscherni intginas activitads che Vus pudais duvrar sco rumpaglatsch durant ils inscunters.
- N'emblidai betg da planisar temp liber durant ils inscunters. D'emprender d'enconuscher in l'auter durant mangiar in sandwich u durant in gieu da ballape è gist uschè impurtant sco da far ensemen pensums.
-
7
7. Inoltrar il rapport final
- Suenter la realisaziun dal barat da classa inoltrais Vus entaifer 30 dis in curt rapport final. Tut tenor il dumber effectiv da scolaras e scolars participants u persunas d'instrucziun resp. persunas accumpagnantas e tut tenor il dumber dals inscunters pajain nus la summa restanta u dumandain ina restituziun.
-
8
8. Rapportar davart il project
- Parti Vossas aventuras ed experientschas en in rapport, entaifer Vossa scola ed anc pli lunsch. Motivai autras persunas d'instrucziun d'organisar in barat da classa. Faschai stim da menziunar la finanziaziun da Movetia. Nus mettain a disposiziun il logo ed elements da text.
- Ans contactai per schlargiar Vossa distanza da recepziun, p.ex. cun ina contribuziun en in magazin u sin nossa pagina-web.
Dumondas e respostas
Inoltresch jau la dumonda da promoziun era per mia classa partenaria?
Gea. Ina dumonda da promoziun per l'entir project da barat basta. Movetia paja lura separadamain las contribuziuns lubidas a las partenarias ed ils partenaris involvids.
Nus ans inscuntrain gia ils proxims dis per noss barat da classa. Poss jau anc inoltrar ina dumonda?
Gea. Vus pudais inoltrar ina dumonda da sustegn anc enfin in di avant l'inscunter fisic da las classas.
Tge infurmaziuns duvrais Vus da mai, sche jau inoltresch ina dumonda da promoziun?
Fixai ils termins per ils inscunters a moda approximativa e formulai in program general. Planisai en quel almain in'activitad a di che pussibilitescha a las scolaras ed als scolars d'interagir sur ils cunfins linguistics ora. Plinavant sto il program dal project avair almain dus puncts che stattan en connex cun l'emprender linguas u la cultura svizra.
